રાજભા ગઢવી તેમના શૂરથી આજેપણ ડોલાવે છે આખું ગુજરાત જાણો તેમની વ્યથા..

રસપ્રદ વાતો

હાલ સૌરાષ્ટ્ર કાઠિયાવાડ સહિત ગુજરાતભર માં રાજભા ગઢવી એક જાણીતા લોક સાહિત્યકાર તરીકે ઉભરી આવ્યા છે. યુવાન ઉંમર માં તેમનો બુલંદ કંઠ અને બોલવાની છટાથી આજે તેમના હજારો પ્રશંસકો છે. ગીરના લીલા પાણી નેસમાંથી આવનાર રાજભા ગઢવી ભણેલા નથી એ છતાં પણ કોઇ પ્રખર લોક સાહિત્યકાર ને શોભે તેવી તેમની બોલી અને ગાયન શૈલીએ ગુજરાત માં ઘણી જ ખ્યાતિ મેળવી છે. અભણ હોવા છતાં તેમણે ઘણા ગીતો ની પણ રચના કરી છે. ચારણ કુટુંબ માંથી આવતા રાજભા ગઢવી ના લોક ડાયરા માં જનમેદની પણ ખાસ્સી જોવા મળે છે.

રાજભા ગઢવી:

રાજભા ગઢવી નો જન્મ તુલસી શ્યામ નજીક આવેલ બાણેજ પાસેના લીલા પાણી નેસમાં થયેલો. રાજભા ગઢવી પાસે કોઇ શાસ્ત્રીય સંગીત નું જ્ઞાન નથી પણ તે સૌરાષ્ટ્રની લોકશૈલી અને લોકબોલી ના ગીતો, છંદ, સપારખાં પ્રભાવી રીતે ગાઇ શકે છે. લોકસાહિત્ય એ સામાન્ય જનતા ના દિલને સ્પર્શ કરતું સાહિત્ય છે. રાજભા આવા ગીતો ગાય ત્યારે લોકોની પુષ્કળ વાહવાહી મેળવી શકે છે. લોક ડાયરામાં તેમની વાતો દેશદાઝની લાગણી યુક્ત હોય છે. ધર્મ, સંસ્કારિતા અને લોક સંસ્કૃતિની વાતો તેમની પહેલી પસંદ છે. હાલાજી અને પટ્ટી ઘોડી, મેરામણજી જાડેજા અને ચારણનો પ્રસંગ, રામવાળા માટે ગીગા બારોટે લખેલ સપારખું જેવી તેમની વીરરસ ભરેલી વાતો આજે ખાસ્સી પ્રસિધ્ધ છે.

પશુપાલન નો વ્યવસાય:

તેમને કોઇ વ્યસન નથી અને બુલંદ રીતે ગાવાની કળા તેમની આગવી શૈલી છે. મુળે ગીરની મધ્યે આવેલ લીલા પાણી નેસમાંથી આવતા રાજભા ગામડા ની પ્રકૃતિમાં રહેનાર છે. નાનપણ થી પશુપાલન નો વ્યવસાય હોવાથી તેઓ વગડા માં ભેંસો ચારવા જતાં. હજી પણ તેઓ ઘરે હોય છે ત્યારે ગીરના જંગલો માં ભેંસો ચારવાને નીકળી પડે છે. પ્રકૃતિ માટે નો તેમનો પ્રેમ તે ઘણીવાર વ્યક્ત કરે છે. નાનપણ માં ગીર માં ભેંસ ચરાવવા ની સાથે રેડિયો પર ભજન સાંભળતા રાજભા આજે ગુજરાત સહિત આફ્રિકા માં પણ પોતોની સૂરાવલી રેલાવી ચૂક્યા છે. આજે પ્રખ્યાત લોક સાહિત્યકાર અને કવિ હોવા છતા સામાન્ય અને ગામઠી જીવન શૈલીમાં માને છેભણેલ ના હોવા છતાં તેમના રચેલા કાવ્યો પૂજ્ય મોરારીબાપુ ને પણ પ્રશંસા કરવા પ્રેરે તેવા છે.

કૃષ્ણ-રાધાના પ્રેમ:

યુવાન વયના રાજભા ગઢવી એ પ્રકૃતિને સંબોધી ને કૃષ્ણ-રાધાના પ્રેમનું ગીત સાયબો ગોવાળીયો ની રચના ૨૦૦૩ માં કરી હતી. તેમના આ લોકશૈલી ના ગીતે એટલી હદે ખ્યાતિ મેળવી છે કે આજે ઘણાં લોકો તેને લોકગીત ધારી બેઠા છે, અનેક ગુજરાતી ગાયકો એ આ ગીત ગાયેલું છે અને શ્રોતાઓ દ્વારા પણ ઘણીવાર આ ગીત રજૂ કરવાની માંગણી થતી હોય છે. કિર્તીદાન ગઢવી જેવા પ્રખ્યાત નામ ગુજરાતી ગાયકો ને પણ આ ગીતે ખાસ્સી પ્રસિધ્ધી અપાવી છે. રાજભા ગઢવીએ આ ગીત ઉપરાંત પણ બીજા ઘણાં ગીતો લખ્યાં છે. જેમાં મરજીવા પાઘડીવાળા, સમરાટ ભાગ્યો શ્વાનથી, દેવાયત બોદરને સપને આવી એની રાજપૂતાણી બેન જેવાં ગીતો લોક ડાયરાઓ માં લોકપ્રિય છે.

સમાજના એક કાર્યક્રમમાં:

તેમણે લખેલા દુહા, છંદ, ગીતો વગેરે “ગીરની ગંગોત્રી” નામના પુસ્તક માં સંગ્રહિત છે, કિર્તીદાન ગઢવી રાજભાને ક્યારેક “રાજો ચારણ”ના હુલામણા નામથી સંબોધે છે. રાજભા ગઢવી ની એક ઔર ઓળખ એમના મહારાણા પ્રતાપ અને ચેતક અશ્વ પ્રત્યેની અદ્ભુત વાતોની પણ છે. રાજભાએ ૨૦૦૧ માં પોતાના સમાજના એક કાર્યક્રમમાં થી ગાવાની શરૂઆત કરેલી એવું કહેવાય છે કે, મુખ્ય કલાકાર થોડા મોડા આવવાથી રાજભાને દુહા, છંદ બોલવાનો મોકો મળેલો. લોકોને તેમની ગાયકી પસંદ પડેલી અને બસ ત્યાર થી રાજભાએ કદી પાછું વળીને જોયું નથી. આજે તેઓ પ્રખ્યાત નામ લોક સાહિત્યકાર તરીકે ની નામના ધરાવે છે. રાજભા ગઢવી પોતાના કાર્યક્રમો માં અચુકપણે જુનાગઢ ના રાજવંશી રાજા નવઘણની અને તેમના પાલક દેવાયત બોદર અને તેમના ધર્મ પત્ની, ઉગો, જાહલ, વાલબાઇ, ભીમડા રખેહરની વાત કરે છે. તેમની ઉપર તેમણે લોકબોલી ના ગીતોની પણ રચના કરી છે.

ઇસરદાન ગઢવી:

અત્રે ઉલ્લેખનીય છે કે, જુનાગઢ પર અણહિલપુર ના દુર્લભસેન સોલંકી એ કરેલા આક્રમણ માં ગુજરાત અને સોરઠની સેના વચ્ચે ઉપર કોટમાં યુધ્ધ થયું એમાં જુનાગઢની સેનાની હાર થયેલી એ પછી સોલંકીઓ ની નજરમાં થી બાળક રા’નવઘણને બચાવીને આલીદર બોડીદર ગામના આહિર દેવાયત બોદર અને તેમના ધર્મ પત્નીએ બાળક રા’નવઘણને પોતાના પુત્ર નું બલિદાન આપીને સાચવ્યો હતો. રાજભા ગઢવી ને આજે ઘણા લોકો ઇસરદાન ગઢવી જેવા પ્રખ્યાત લોક સાહિત્યકાર ની લોક પુરી કરનાર તરીકે પણ જુએ છે. તેમની ઉમદા વાતો અને પહાડી કંઠની ગાયન શૈલી પર લોકો આફરીન પોકારી ઉઠે છે.

Leave a Reply

Your email address will not be published. Required fields are marked *